कविता संकलन ( उद्या जगेन)

उद्या जगेन...



उद्या जगेन उद्या जगेन म्हणून
आजवर मरत राहिलास
न पाहीलेल्या भविष्यासाठी
वर्तमानात झुरत राहिलास

सांग कधी जगलास का
ते उद्याचं जीवन तू आजवर?
आजही तेच करतोस
जे आयुष्यभर करत राहिलास



मर मर मरुन उद्यासाठी
तू खूप काही केलंस
तो उद्या आलाच नाही
तू तुझ्यासाठी काय केलंस?

आज भुतकाळाच्या जखमा पाहून
का रडतोस तू
सुखासाठी हजारदा मन मारलंस
हे तू काय केलंस?



एक दिवस तरी सांग
जेव्हा नव्हता दु:खाचा चोप
आठवतंय का कधी मिळाली
शेवटची साखर झोप!

अरे तो दिवस आलाच नाही
ज्याची तू वाट पाहीलीस
आठवतंय का कधी केलीस
अखेरची मन मौज



तू म्हणतोस जे केलं
त्यामुळे मी आजवर जगलो
आणि एवढं करुनही
आजवर ही नाही मी थकलो

घरासाठी दारासाठी संसारासाठी
मी खूप काही केलं
हा…  माझ्यासाठी मी आजवर
काही नाही करु शकलो.



आयुष्यभर धावलास तू
न पाहीलेल्या उद्यासाठी
तू राहीलास उपाशी
नाही केलास आराम जीवासाठी

सांग हा जीवनाचा खेळ होता
का होता नशिबाचा तमाशा
तू जगलास खरा पण
कोणासाठी आणि कशासाठी?



सोडणार आहेस त्या जगासाठी
की तुला विसरणाऱ्या घरासाठी
कपाटातल्या तिजोरीसाठी
का त्या पोष्टातल्या खात्यासाठी

आता तरी सांग
कशासाठी जगलास तू आजवर
बोल?
हातातल्या काठीसाठी की
डोळ्यावरच्या जाड भिगांसाठी!



बघ, आजही तरी तुला
चिंता पुन्हां त्या उद्याची

चंदनाच्या लाकडाची आणि
शुद्ध वनस्पती तुपाची.…!!!